سنتين يا ساره يا جميله :)

أول كتابه ٢٨ أكتوبر ٢٠١٥

يا ساره إزيك.. عامله إيه.. فتحت البلوج لقيتني بقالي كتير قووووي مكتبتش اي حاجه.. من شهر يونيه ! بس كان لازم أكتب النهارده ضروري عشان كمان تلات أيام ساره حبيبة ماما وبابا الجميله هتتم سنتين :) .. ربنا يبارك فيكي ويخلينا لبعض :) 

مش قادره أقولك كبرتي قد إيه ماشاء الله في التلات شهور اللي فاتوا يا سوسي.. ما شاء الله عليكي.. بصي يا ستي.. 

أولا انتي كنتي بتتكلمي من فتره زي مانا قلتلك قبل كده.. بس مكنتيش بتقولي جمل على بعض.. لحد أول جمله قولتيها "قولي إيه مااما" يعني بتقولي ايه يا ماما.. وبعدين توالت الجمل.. مش عارفه حكيتلك على القطه ولا لأ.. بس كان في يوم كده كنتي بتتفرجي على كارتون وبالصدفه جت اغنية فيها قطه كارتون كان عندها واوا في اديها وفي بنوته شافتها وراحت عالجتها وحطت لها شاش على ايدها وخدت بالها منها لحد مالقطه بقت حلوه وبتضحك وبتجري.. يا سوسي الفيديو ده فضل مأثر فيكي، أو بمعنى أصح في مصر كلها لمدة خمس شهور تقريبا 😀😀 

الجمله الشهيره " قطه كويسه يا مااما.. مالها القطه يا مااما.. عندها وااوا.. وبعدين قطه ضحكت" .. انتي سألتي مصر كلها السؤال ده يا ساره!!! 😀😀 .. ولما رحنا دبي لبابا في شهر ٨ سألتي دبي كلها السؤال ده 😀😀ده زائد بقى انك مكنتيش 

بتسألي مره واحده.. لا ييجي ٧٠٠ في اليوم 😀😀😀

المهم يا ستي.. انتي ما شاء الله عليكي من فتره طويله كمان وطبعا بفضل ربنا أولا ومجهوداتي انا وبابا ثانيا انتي شاطره ومن الاطفال القليلين اللي حافظين (ABC لحد الآخر.. وأ ب ت لحد الآخر.. و ١٢٣ لحد عشرين.. و123 لحد 20 وكمان عارفه الألوان.. والأشكال بالعربي والإنجليزي) 😊😊 ممكن ابقى اسجللك صوتك وانتي بتقوليهم كلهمان شاء الله.. بعد ماجينا دبي في نص شهر ٨ لقيناكي انتلقطي في الكلام على الآخر ماشاء الله.. والغنى بقى.. وبقيتي رغايه تقريبا.. بتعملي حاجات جميله يا ساره..

وفي انجازين كباااار قوي بقى عملناهم لما جينا دبي.. أول مره جينا دبي بالظبط يوم ٢٩-٨-٢٠١٥ قررت أنا بكامل قواي العقليه اني أقطع التيتينه عشان حضرتك تبطلي تاخديها وانتي بتنامي.. كنت بتنامي بيها الضهر وبالليل بس :).. وفعلا حصل الحمدلله :) أول وتاني يوم كانت حاجه تقطع القلب.. شكلك كان غلبان قوي وانتي كل ماتحطيها في بقك تلاقيها متغيره من فوق.. تقوليلي فين التيتينه يا ماما مع انك مسكاها في ايدك.. وتعيطيييي جااامد وتقولي انتي فين يا تيتينااا.. كنتي صعبانه علينا قوي 😀😀 هي موجوده لحد دلوقتي.. إن شاء الله هبقى احطلك صوره ليها عشان تشوفيها.. 

الإنجاز التاني والأهم هو انك شهر اكتوبر اللي فات وقبل عيد ميلادك بالتحديد يوم ١٨ اكتوبر ٢٠١٥ يعني قبل عيد ميلادك ب ١٥ يوم... الانجاز هو انك خلاص مبقاش في بامبرز 😀 اصعب فتره كانت اول تلات ايام.. كنا في دبي وانا حطيت فوط على الارض في كل حته 😀😀 ومشمع وهيصه.. المهم بغض النظر عن التفاصيل اللي مش ريحتها حلوه قوي 😊 بس انتي كنتي شاطره قوووي وفهمتي بسرعه وتاني اسبوع كنت خلاص الدنيا تمام التمام ماشاء الله 👍🏻☺️

بتوحشيني :)

ساره حبيبتي يا جميله إنتي :) النهارده ٢٠ يونيو ٢٠١٥ .. من أربع أيام بالظبط كان يوم أربع :) قررتي إنك تبطلي تاكلي من ماما :)))) كبرتي يا حبيبتي :) جربت معاكي كتير تاكلي تاني.. بس إنتي بتحبي تعدي في حضني بس من غير ماتكلي :)) .. 

إنتي عندك دلوقتي سنه و سبع شهور و عشرين يوم :)) ربنا يباركلي فيكي :) 

أنا مش زعلانه خالص ومرتاحه الحمدلله إنك قررتي كده :) بس ساعات بتوحشيني وإنتي في حضني وبصالي وانتي بتاكلي كده :))

بحبك قوي :)) وبحب وشك وعنيكي اللي شبه بابا حبيبي وضحكتك :)) يا رب تفضلي تكبري قدامي كده جميله ومؤدبه :) 

سنه ونص و ١١ يوم :)

إزيك يا سوسي يا حبيبتي :) .. بقالي كتير مكتبتش حاجه :)

هقوللك في السريع كام حاجه مهمه كده :) .. بصي يا ستي :) إنتي كبرتي ماشاء الله وجميله :) ودمك خفيف وشقيه ساعات :)

وعندك سنتين فوق وسنتين تحت، وضرس على الشمال تحت، لوحده كده كإنك واكله لبانه :)).. ومن إسبوعين، بدأ يطلع ضرس تاني فوقيه، وكمان سنتين فوق :)) 

بقيتي تطلعي على الكنبه خلاص ومتمكنه :) .. وتفضلي واقفه أو تجري فوق الكنبه لحد مانقوللك قعدي يا سوسي ٥٠٠ مره ونزعق، ساعتها تزحلقي رجلك كده وتعدي :)) :-*

وبترقصي!! هههه بطريقه زي العسل وبتضحك :)) على أي موسيقى أو أغنيه :) والكلمات اللي بقيتي تقوليها "ماما وبابا طبعا، ولاكه يعني لأه، وسيبي، A, B, ب، ت، سبع، سوسي، تيته وتيتو، وصوت القطه والبقره والبطه والكلب.. 

وبقيتي شاطره  بتساعديني في لم الغسيل ونشره :)) وتجبيلي الإسدال لما آجي أصلي، وكمان بتجبيلي الجزمه لو كنا خارجين :))

 

بابا سافر زيمبابوي مع الشغل شهر ٣ اللي فات :( وقعد ٣ أسابيع، وكنتي لما بتشوفيه على السكايب بتعيطي أول أسبوع وكام يوم كده، وكنتي بتصعبي علينا قوي :( .. وتفضلي تقولي "آي آي" :)) ده كان دلع بابا عندك :) ويوم مارجع، كنتي نايمه :) ولما صحيتي الصبح، راح هو عشان يجيبك من الأوضه، فرحتي قوي قوي، وبعدين قفشتي عليه لمدة يوم ونص تقريبا 😀 كإنك بتعاتبيه إزاي تمشي وتسيبني كل ده 😀.. وكل مايكون شايلك، تبصيله كده، وتعملي وش حزين :))) .. ولما تشوفي أي صوره أو ڤيديو ليه، تعيطي عشان فاكراه مشي تاني ودخل في السكايب، حتى لو كان هو اللي شايلك!! 😀😀

الشهر اللي فات سافرنا الجونه إحنا التلاته :) وكانت إجازه لطيفه الحمدلله، وانتي عمتي في البحر لعبتي في الرمله، وكنتي شاطره بس تعبتي بابا قوي :)) .. والناموس أكلك تقريبا 😀😀 كان عندك أكتر من ٢٣ قرصه منهم ١٥ في وشك بس.. هههه

بابا دلوقتي مسافر دبي بقاله إسبوعين :) ولما بقولك يلا نكلم بابا وأجيب الآي باد، تفرحي قوي، وتقعدي تقولي "بابا.. بابا" :)

ولما يظهر في الشاشه، مابقتيش بتعيطي، بتفرحي، وساعات بتكشري بس ترجعي تاني تندهي عليه، وتوريله اللعب وتنطي، وترفعي إيدك فوق كده زي مابتلعبي معاه.. وتلخبطي اللعب، عشان تلعبوا لعبة "كله في المصنع" 😀😀 لعبتكو المشهوره 

الإسبوع اللي فات، إتطعمتي تطعيم السنه ونص، كانت آول مره يا حبيبتي تتعبي كده :) رجلك كانت وجعاكي جدا، وسخنتي، وبطلتي تمشي على رجلك يوم ونص كاملين :) ،، أنا وبابا إتفقنا نطلعلك جواز سفر عشان لو قررنا نروح لبابا دبي :) واتصورتي صوره حلوه :))

آه صحيح، بتحبي البيض المسلوق جدااااا.. والسلطه :)) والميه بتاعة السلطه،، والكرونه باللحمه المفرومه :))

أول كلماتك يا سوسي يا جميله :))

البوست ده بقى هكتبلك فيه الكلمات اللي قولتيها لما بدأتي تعبري أو تكوني عاوزه تقوللي أي حاجه :))

على فكره إنتي أول كلام قولتيه خالص كان ،، مام مام مام ما،، و باب باب باب با.. :)

أول كلمه بعد كده كانت هندي ،،هههه،، أكانيه "akanee" ..كنتي طول الوقت بتقولي الكلمه دي.. وكمان "جاييياه" "gayeeyah"،، وبابا وأنا كنا بنهزر وبنقول ،، جاييياه لوحدييياه :))

وبتقولي "تاتا" لما بتكوني عاوزه تمشي على الأرض.. وتاكن "tuken" أو "takin" أو "duken" محدش عارف،، هههه

من شهر ونص شهرين كده،، كنتي بتاخدي دش، وأنا بلفك بالفوطه وبقوللك يللا يللا خبي رجليكي عشان الدنيا ساقعه، فوجئت إنك قولتيلي " شااائعه" ههههه كنتي عسللل قوي وانتي بتقولي كده، ومن يوميها وانتي هاريانا شااائعه.. وساعات تقوليها بال س نص نص كده على قد ماتقدري يعني،، وفوجئت برضه لقيتك بتقولي كده وانا بعد معالق السيريلاك وإنا بعملهولك، بقول واحد، اتنين .. لقيتك بتقولي شائعه،، قصدك سبعه يعني :))

وكان مره في كارتون، واحد فيه بيقول "ساعةٌ واحده".. لقيتك بتبصيلي وبتقولي شااائعه :)))))

ومن كام إسبوع كده، بتقولي "ليجو ليجو ليجو" ههههه .. و كمان " بونجا" 

آه وكمان " تينجا تينجا تينجااا" .. وصادفت إن كان في كارتون إسمه كده على فكره :))) لو قلتي حاجات جديده أو بابا إفتكر حاجه هبقى أكتبها بقى تاني إن شاء الله :))

سنه وتلات شهور تقريبا :)

إزيك يا ساره :) .. بقالي تقريبا تلات شهور مكتبتش حاجه.. عملتي حاجات كتييييير قوي فيهم،، وكبرتي قوي كمان ماشاء الله :) هتتمي سنه واتت شهور آخر الشهر إن شاء الله.. دلوقتي بتمشي لوحدك وبتجري كمان بس لما بتعدي على الأرض مش بتعرفي تقومي لوحدك.. من كام يوم بس قومتي كام مره كده بس لسه مش متمكنه :))

دلوقتي بقيتي تاكلي معانا عادي.. مع إن معندكيش غير سنتين في بقك الظغنون ده :)) .. وبتحبي البيض المقلي قوي ماشاء الله بتفطري منه معظم الوقت.. وبتحبي تاكلي المكرونه أو اللسان العصفور باللحمه المفرومه.. والشوربه والملوخيه.. سيبك من الأكل..

أنا دلوقتي بكتب الكلام ده الساعه ٨ الصبح.. في السرير.. وانتي نايمه في أوضتك، يا رب تفضلي نايمه كمان شويه :))) وبابا نزل من ساعه كده، راح الشغل :) 

يوم الأربع بكره إن شاء الله عمتو بطه هتيجي تزورنا هيه وبلال وعبدالله، أول مره ييجوا كده لوحدهم، وأنا وبابا فرحنا قوي إنهم هييجوا إن شاء الله.. إن شاء الله يكونوا يومين حلوين :)) 

إمبارح بالليل.. كنت في المطبخ بعمل حاجات وبابا كان بيغيرلك في الأوضه، وبعد ماخلصتم.. سمعتكوا بتضحكوا جامد قوي :))) كان صوتكوا جميل ماشاءالله :) بابا عمال يلاعبك وانتي تضحكي جامد وهو كمان كان بيضحك جامد قوي :))

لما سألته كنتم بتلعبوا إيه.. قاللي تلات لعب: كنتي بتقي على السرير وتسندي على ضهر السرير وبعدين تقومي مرجعه نفسك لورا لوحدك قال إيه بتقعي يعني، وبابا يروح ماسكك وانتي تقولي آآه :D .. وكمان بابا كان بيزغزغك في رجليكي .. وكمان بيقولك اقعدي باين وانتي واقفه تروحي مرجعه نفسك لورا برضه وتقعي وهو يمسكك.. لعب عبيطه قوي، مش كده!؟؟ :D 

بس كنتي بتضحكي جامد وبابا كمان :)) 

ممم، كمان بقيتي بتحبي تقفي في البلكونه قوي ،، الدنيا شتا وبرد ،، بس لما بيكون في شمس بتحبي تتفرجي على الشارع قوي :)) 

مش قادره أقوللك كنتي بتكوني فرحانه إزاي وإحنا نازلين.. وأول مالبس الجزمه تفضلي تمشي ورايه ولازقه فيه كده، بتقوليلي يعني يللا ننزل،، وكل ده عشان معظم الوقت كنا لما بننزل بنقابل بابا :)) عشان كده بتكوني فرحانه :) وأول ماننزل وأحطك في الكرسي بتاعك في العربيه، تفضلي تقولي "آآييي" .. دي الكلمه اللي كنتي بتقوليها لبابا :))) أقوللك أيوه يا سوسي هنشوف بابا كمان شويه :)) ولما نقابله تفضلي تفرحي قوي وتقولي الكلمه ده ١٧ مره :))) وبابا كمان كان بيفرح قوي :))