أسكندريه أول مره :)

الإسبوع اللي فات يا سوسي طلعنا إنتي وبابا وأنا إسكندريه مع جدو وتوتا وعمو بخيت وسحر :) يومين ونص كده :)) كانوا حلوين قوي وانتي كنتي مبسوطه الحمدلله :) 

عيد ميلادك الأول يا سوسي :)

إمبارح كان أول عيد ميلاد ليكي يا حبيبة قلبي أنا وبابا :)

إمبارح كان الجمعه :) ٣١/١٠/٢٠١٤ .. ومن ٣ أيام بالظبط وأنا بأكلك الصبح وإنتي بترضعي عضتيني كالعاده :( ... وجعتيني قوي أكتر من المعتاد :) المفاجأه إني لقيت أول سنه جميله :) طلعت لساره الجميله :) وبابا كان نايم جمبنا بصيت وركزت كده لقيت فعلا في تلات نقط بيضه :) أول سِنه تحت على الشمال :) أخيييييرآ يا سوسي :) الحمدلله :)

غنيت لبابا وقلتله " السنه جت يا بابا .. يا بابا السنه جت" :D فرح قوي وضحكنا وانت ضحكتي ولا إنتي فاهمه أي حاجه :D 

عملنالك عيد ميلاد جميل وبابا وأنا زوقنالك البيت وجبنالك التورته :) كان فيه جدو وتوتا وسالي وعمو محمد ومريم وعبدالرحمن وسحر وعمو بخيت وعمو مجدي وطنط إيناس ولينا وأحمد وندا وعمو محمد وياسين :) وكلنا كنا مبسوطين :) وجابولك لعب جميله وإتصورنا صور مضحكه :))) كان نفسي بجد كوووول الناس يكونوا موجودين في عيد ميلادك يا سوسي :) بس ماكانش البيت هيقضي عشان أنا وبابا عديناهم لقيناهم ٣٦ ماشاءالله :)

بتمشي لوحدك دلوقتي أكتر حاجه ٣ خطوات :) بس بتقفي الحمدلله :) 

ربنا يحفظك يا ساره يا حبيبتي ويحفظك من كل سوء :) 

١٠ أيام وتتمي سنه إن شاء الله :)

النهارده ٢١ أكتوبر ٢٠١٤.. فاضل ١٠ أيام وتكوني عندك سنه إن شاء الله يا سوسي يا حبيبتي يا جميله :) هقولك ملخص عن الإنجازات اللي إنتي عملتيها يا حلوه يا شطوره :) 

- بقيتي بتقفي لوحدك من غير ماتسندي على حاجه أو حد. أطول مده وقفتيها مانت تقريباَ ١٥ ثانيه :)

- بس بتمشي كويس لمل بنكون ماسكين طراطيف صوابعك كده وبتجري كمان ساعات :) يا رب تمشي قريب إن شاء الله عشان معندكيش ولا سنه لحد دلوقتي ... ههههه

- بتزحفي كويس ماشاء الله 

- بتقولي بابا وماما بس ده من بدري قوي ماشاء الله عليكي، الظاهر هتطلعي رغايه .. هههه

- بتحبي الخروج قوي وبتعدي تحركي رجلك جامد قوي وإحنا رايحين على الباب وتعدي تنفخي كده.. ههه

- من كام يوم عرفتي تدخلي الحاجات جوه بعضيها الحمدلله، يعني تحطي مكعب جوه مكعب تاني مفتوح 

- بتاكلي بطاطس وفراخ وكوسه وجزر وعدس ورز ومكرونه وبصل وبروكلي وقرع وزبادي وتفاح وكمترى وبطاطا وسيريلاك بالقمح والفواكه :D

- بقيتي ساعات تتعصبي علينا وتقوليلنا " أوأو" زي ماحنا بنفولك لو مسكتي حاجه غلط

- بتصقفي طبعآ كويس جدآ . ههههه

- ممكن تفضلي تلعبي مع فتفوته في الأرض أو حتة ورقه بتلمع أكتر من ربع ساعه 

- آه كنت هنسى أقولك إنك بتعرفي تدينا بوسه من بعيد كده :) ، وكمان إدتيني بوسه تلات مرات في خدي، بس طبعا بتفتحي بقك وخلاص كده تبقى بوسه!!

- وكمان كنتي بتعضيني جامد قوي وإنتي بتاكلي وبعدين تعدي تضحكي عليه لما أقول أي وجعتيني يا سوسي

- كنتي بتعملي حركه بتضحك قوي قوي بعنيكي عشان تضحكيني :D أول مره عملتيها معايا أنا وسحر وفضلنا نضحك كتير، بعد كده بقيت أقولك " سوسي ممكن تعمليلي الحركه" تروحي عامله عينك كده حاجه تضحك قوي!! :D وساعات كنتي تعمليها لما تزعليني، عشان تضحكيني، سبحان الله :)))

كل سنه وإنتي طيبه يا سوسي يا حبيبتي يا جميله :) حبيبة بابا :)) 

التيتينه إتكسرت يا سوووووسييييي !!! :|

إمبارح.. كان يوم الأحد.. عمو محمد جالنا الظهر عشان كان مسافر السعوديه بالليل.. وهو وبابا إتفقوا ييجي يعد معاه شويه لحد معاد السفر وبعدين بابا يوصله المطار.. مع إنك كنتي مبسوطه مع عمو محمد قبل كده ولما سافرنا بني سويف كنتي لطيفه معاه، بس كنتي اليوم ده آفشه عليه ومش راضيه تروحيله :) 

وجيتي خادتي عليه ورحتيله فبل ماينزل بنص ساعه!! :)))

المهم اليوم كان لطيف الحمدلله :) بس حصلت حاجه لا كانت على البال ولا على الخاطر.. كنتي حطه التيتينه في بقك وكنتي عامله بيبي كبيييييييير قوي يا سوسي :D وأنا كنت بشطفك وقعتي التيتينه من بقك، مع إن عمري مادخلتك الحمام بيها، بس يشاء القدر إنها تقع وتكسر !!! أن أن أن آآآن، تش!!! 

النهارده تاني يوم تنامي بالليل من غيرها.. إنتي ماكنتيش بتاخديها على طول الحمدلله، بس بقالك شهور لازم تاخديها سلعة النوم، لدرجة إني وأنا بحطك في السرير كنتي بتفضلي تبصيلي وتبصي لأيدي كإنك بتقولي "ها فين التيتينه، أنا مستنيه أهو" هههه

إمبارح نمتي بعد ساعه تقريبا من المحاولات المستميته وبابا كان بيوصل عمو محمد المطار.. النهارده بقى تقريبا نمتي في ساعه إلا ربع !!! آآآآه

على فكره بابا حاول يجبلك واحده إمبارح بس ملقاش، إحنا إتفقنا إننا هنجيب واحده، بس مش هنستخدمها تاني في النوم كده، عشان إنتي يا حبيبتي بقيتي متعلقه بيها جداااا..

أما أنا وبابا حبيبي بقى، ربنا يعينا الأيام الجايه إن شاء الله لحد ماربنا يكرمك وتتعودي تنامي من غيرها :)

سوسي حبيبة ماما :)

عندك ١١ شهر :)

يا سوسي يا حبيبتي يا جميله :) .. كبرتي وبقى عندك ١١ شهر وخلاص فاضلك إسبوع وتدخلي في ال١٢ :))

ربنا يخليكي لينا ويبازك فيكي :) .. قلت أحكيلك إنتي بقيتي عامله إزاي شويه وبتعملي إيه دلوقتي :) ... وأنا بكتب دلوقتي، إنتي نايمه على الكرسي بتاعك الجميل 

بقيتي شاطره وبتسمعي الكلام :) ومعاندكيش ولا سنه :D .. دلوقتي بقيتي تنامي في أوضتك.. وأنا وبابا بنام معاكي في الأوضه لحد ماتتعودي إن شاء الله :) يللا شدي حيلك عشان أنا وبابا أوضتنا وحشتنا بقى :)))

من تلات أسابيع كده بابا خد أجازه وطلعنا رحله جميله قوي ورحنا شرم الشيخ :)) أول مره أنا وبابا نروحها.. كانت أجازه جميله جدا يا ساره :) وإنتي كنتي شاطره وجميله الحمدلله :)) .. وأول مره تنزلي البسين مع بابا :)) ليكم صور حلوه قوي هتكوني شفتيها إن شاء الله :) وكنتي شاطره ماشاءالله وماخفتيش من الميه.. بس أنا وبابا ماكناش نعرف إن في بامبرز مخصوص للبسين فانتي كنتي بتلبسي البامبرز العادي بتاعك وكان بعد ١٥ دقيقه في الميه بيكون عامل زي العوامه!! ههههه :) وكنتي لابسه مايوه بكيني جميل قوي.. نزلتي مع بابا ٣ مرات وكنتي كل مره بعد ماتطلعي من الميه تنامي نومه كبيره ومانكونيش حاسسه بأي حاجه :) 

وكمان نسيت أقولك إنك كنتي شاطره في الطياره وجدعه :)) فضلتي مع بابا وإحنا رايحين وكمان وإحنا راجعين :) .. وإحنا في شرم كنتي بتلعبي وتكلمي كل الناس اللي حولينا أو بنعدي جمبهم!! وكان شكلك مضحك عشان كنتي زغنونه وحلوه كده :)) 

آه صحيح :) نسيت أقولك إنك في الأجازه دي عملتي حاجات لأول مره .. أول مره تحبي في الأرض بجد وإحنا هناك :) وبابا كان بيصورك ڤيديو بالصدفه .. وكمان بعد مارجعنا القاهره بدأتي تقفي بقى لوحدك وإنتي ماسكه في السور بتاعك الملون .. وكمان بقيتي تعرفي تقعدي لو كنتي نايمه لوحدك :) بس إنتي دلوقتي بقيتي إيه بقى مأقولكيش.. حاجه بقى خطيره :))

إنتي صحيتي من النوم بقى فأنا هسيبك دلوقتي عشان أروح أأكلك.. 

بس في السريع هقولك.. آخر الأسبوع إن شاء الله هنسافر بني سويف عند جدو نصر :) عشان العيد الكبير :) والإسبوع اللي فات عمو محمد وطنط مي وهنا وعاليه جم من السعوديه أجازه وشافوكي بعد ماكبرتي بقى :) وعمو محمد حبك قوي وفضل شايلك وإنتي كنتي مبسوطه وكمان يوميها نيمك في السرير بتاعك :) ولعبتي مع هنا وعاليه وكنتي مبسوطه الحمدلله :))   

بابا حبيبي :)

عاوزه أقولك كنتي بتعملي إيه لما بابا بيرجع من الشغل :))

من شهر تقريبا، بدأتي تعملي كده، أول ماييجي ويدخل، ويقول سلام عليكم :) وأنا اقولك سوسي! بابا جه، فجأه ييجي حزن على وشك وتقلبي شفتك اللي تحت كإنك هتعيطي، وساعات كنتي يتبدأي تعيطي فعلا، كإنك عاوزه تقولي، هو فين، تعالى ده إنت واحشني يا بابا :)

ولما يوريكي نفسه، تعدي تعملي أصوات رفيعه وجميله كده كتير :) وتمدي إيديك عشان يقرب وبابا يشيلك تعدي تضحكي وتحركي رجليك بسرعه أوي من الفرحه :) وتشدي في دقنه، وتحطي راسك على كتفه وعلى صدره وتفضلي مبسوطه شويه كتير :) شكلكوا ماشاءالله كان بيكون جميل :)

كنت بقول لبابا إن نفسي في يوم ساره تعمل معايه كده.. نفسي أحس إحساس إن أنا وحشاكي زي بابا ما بيوحشك كده :D

أصل أناوإنتي طول النهار مع بعض :)))) مافيش فرصه إني أوحشك :)

بابا بيحبك أوي :) بيعمل كل حاجه عشان تبقى مبسوطه ومرتاحه :) بيغنيلك، ويضحكك، ويغيرلك وينيمك :) عشان كده إنتي كمان بتحبيه أوي :) ربنا يجعله قره عين ليكي ويجعلك قره عين ليه :) 

خدي بالك من بابا طول عمرك يا سوسي يا حبيبتي :) إحترميه وحبيه، عشان مش كل الناس عندهم بابا جميل وحنين وهادي زي بابا كده  الحمدلله :)

الأغاني والأصوات :)

أول مره تضحكي كنتي تقريبا في الشهر التاني بس كانت كل ضحكاتك من غير صوت :)

كنت أنا وبابا حبيبي تعبانين أوي ومرهقين على الآخر من أول شهر طبعا :) بعد تاني شهر بشويه قولتلك مره "وييييييييي" ودي كانت أول مره تبتسمي في الحياه وأول مره أنا وبابا نحس بيكي بجد :)))) 

بعد كده كنا بنموت نفسنا أغاني وأصوات عشان تبتسمي لنا الإبتسامه العجيبه الجميله اللي من غير صوت دي :D

بابا كان أصلا مألف ليكي كذا أغنيه بس أول واحده كانت في الأول خالص وإنتي لسه مش بتعملي أي حاجه :) 

"يا ساره يا جميله، إحنا بنحبك يا ساره، يا ساره إنتي حلوه، إنتي نونه جميله، حبيبه  ماما وبابا، ماما وبابا بيحبوكي " 

كان بيغنيهالك وهو بيغيرلك وانتي بتعيطي أو زعلانه وبترفصي كده

الأغاني التانيه دي بقى كانت بعد ماكنتي بتبتسمي :)

أول أغنيه خلتك تضحكي بصوت مانت الأغنيه لشهيره " آنا آنا قطقوطو آنا آنا بطبوطو.. هيه " بابا غنهالك مره بعد مألفها فجأه طبعا، وساعتها فضلتي تضحكي وتكركري

وكان في أغاني تانيه كمان، هقولهملك:

"أنا بطه بطه بطيطه، أنا قطه قطه قطيطه، أنا نونه وإسمي نونه، أنا شكلي نونه، أنا نونه وأحلى نونه" وساعات كنا بنضيف أنا وزه وزه وزيزه" ههههه :D دي تأليف بابا حبيبي برضه

أنا دلوقتي على فكره قاعده مع بابا بره وهو بيشغل على السفره، وانتي نايمه في الليفينج :) 

"يا بطاطا يا بطاطا يا بطاطاتي، إنتي أحلى بطاطا في الدنيا دي، يا بطاطا يا بطاطا يا جميله أنتي"  تأليف بابا برضه

" صباح الخير يا بطه صباح الخير يا قطه، صباح الخير يا توتي صباح الخير يا فروتي، صباح الخير يا نونه صباح الخير كانونه"

دي تأليف ماما، أغنيه الصحيان من النوم

" نامي يا نونه، نامي يا حلوه، إنتي جميله جميله وحلوه، حبيبه بابا حبيبه ماما، سوسي حبيبتي، سوسي جميلتي " :)) 

دي تأليف ماما برضه، بتاعه النوم

بس الصراحه يعني والحق إن أغاني بابا أحلى كتير من الأغاني بتاعتي :))))))

هكتبلك أي أغنيه جديده في البوست ده بقى إن شاء الله :))

الشهر ونص اللي فاتوا :)

إزيك يا ساره يا حبيبتي :)

بقالي شهر ونص مكتبتش حاجه من غير سبب :) النهارده الخميس ١٢ يونيو ٢٠١٤ إنتي عندك دلوقتي سبع شهور وإسبوعين يعني دخلتي في الشهر التامن :) وبقيتي حلوه وجميله :) لسه زغنونه مش فاهمه أي حاجه بس بقيتي بتضحكي كتير ماشاء الله وبتقعدي لوحدك كمان :) وبقيت أنا وإنتي نقعد على الأرض نلعب مع بعض كل يوم شويه كده :) 

وبقيتي تاكلي بطاطس وكوسه وجزر وأفوكادو وطماطم وتفاح وموز :)

فاضل أقل من ٢٠ يوم على رمضان الجميل، هيكون إن شاء الله اول رمضان وانتي معانا.. وأنا وبابا هنكون بقالنا ٣ سنين متجوزين :) إن شاء الله هيكون رمضان جميل وانتي معانا لالخطه إننا هنروح بني سويف عند جدو نصر وعمتو بطه وعمو أحمد أول رمضان وبعدين نرجع هنا تاني إنشاءالله :)

بقيتي كمان لما بتنامي تفضلي تلفي يمين وشمال وتطلعي رجلك من بين خشب السرير، رجليكي واديكي :))) شكلك بيكون مضحك أوي :) ولما بتصحي الصبح بتضحكي ضحكه جميله ماشاءالله ولما نغنيلك أغنيه الصبح كمان :)

انا كاتبه بوست فيه الأغاني اللي كنا بنغنيهالك من أو ماتولدتي :) عشان تعرفيهم :) 

إيه كمان يا ستي عملتيه في الشهر ونص دول!!؟؟ بتقولي على فكره بابا وماما من بدري ماشاءالله عليكي :) شكلك هتطلعي بتكلمي حلو إن شاءالله :)

حاجات مضحكه

لما كنتي بترضعي وانتي نوننه خالص كنتي بتفضلي تودي راسك يمين وشمال يمين شمال كل ماتبعدي عن الأكل بطريقه مضحكه اوي.. 

ومن إسبوعين كانت اول مره تعملي بيبي في القصريه.. المفاجأه بقى مش في كده،، المفاجأه انك كنتي على رجلي، انتي .. والقصريه ... هههه

كان إحساس جمييييل أوي هههه

وبعد كده ولا مره خليتك على رجلي ،،كنت بحتطك على العجله بتاعتك بالقصريه، وأكلك وانتي على العجله لحد ماتعملي بيبي :)))))

تطور فجائي :)

النهارده عملتي حاجتين أول مره تعمليهم :) بعد ما بابا رجع من الشغل وأكلنا وإنتي أكلتي.. روحنا أعدنا نلعب على السرير شويه :) وكان أول مره تعرفي تقعدي لوحدك من غير ما حد يكون ماسك ضهرك وكان شكلك جمييل أوي :) وظغنون أوي كده :)

وكمان شربتي ميه أول مره في الكوبايه الخضرا الجميله اللي أنا وباب جبناهالك :)

على فكره ،، الناب اللي أنا كنت كاتبالك عنه ،، عملنا مفاجأه وإختفى !!! :D

مش عارفه إزاي بس ده اللي حصل،، 

أول أكله :)

من كام يوم، كان أول مره تاكلي يا ساره :) 

أكلتي معلقه صغيره فيها تفاح :) و كنتي مبسوطه أوي وفضلتي عاوزه المعلقه تاني !! إن شاء الله كمان كام يوم تاكلي كل حاجه وتكوني بنت شاطره و جميله :)

أول زياره لبني سويف :)

 إزيك يا ساره :) 

النهارده ٧ ابريل ٢٠١٤ .. يوم الأربع اللي فات روحنا بني سويف عند جدو نصر أول  مره من ساعه مانتي اتولدتي :)

جدو نصر و عمتو بطه وعمو أحمد وعمو محمد وبلال وعبدالله جم هنا عندنا بعد مانتي جيتي بشويه عشان يشوفوكي.. وكانوا فرحانين أوي. وجدو كان بيقول إنك ظغنونه أوي :))

كل الناس كانت مبسوطه عشان انتي جايه بني سويف.. وجدو يوميها مانمش عشان كان فاكرنا هنيجي بدري وقال أنا لازم أكون صاحي وفي إستقبال ساره :)) 

قعدنا هناك أربع وخميس وجمعه ومشينا السبت بعد الضهر .. أنا بكتبلك عن الزياره دي عشان كانت أول واحده، بس مش هكتب عن كل الزيارات عشان إن شاء الله هتكون كتير :)) ،، بس أكيد هحكيلك عن الأحداث والزيارات المهمه إن شاء الله :)

أول يوم جدو كان فرحان بيكي أوي، ويناديكي يا سااارّه بالشده كده :))

عمتو بطه يوميها كانت عملالنا ورق عنب وفراخ في الصنيه و ملوخيه، تسلم إديها :)

وباليل جت عمتو وعمو أحمد وبلال وعبدالله :) وتاني يوم بابا طلب لنا سمك وكان جميل :) و بعد المغرب نزلنا زرنا ناس كتير أوي عشان نسام عليهم وكمان عشان يشوفوكي . زرنا أنكل ياسر إبن خال بابا حبيبي وكان عنده طنط زغلوله مامته و طنط رباب أخته وكان في بنات كتير حلوين زيك،، وكان في بيبي جميله زيك إسمها ملك، بنت أنكلل ياسر،، حبوكي أوي وفضلوا يشيلوكي وهما مبسوطين وإنتي كنتي أموره ماشاءالله وبتضحكي :)

وبعدين رحنا عند خالو مجدي خال بابا حبيبي وكان عنده بناته وأحفاده ،، مطولناش هناك بس هما كانوا مبسوطين أوي بالزياره، وبعدين رحنا عند طنط هدى :)

فرحت أوي أوي بيكي.. وفضلت تقول الكلمات المشهوره " حبيبي يا ولاد، وظغنن يا ولاد، ومأنن ياولاد، وروحي يا ولاد، وبسم الله ما شاء الله، ولا حول ولا قوه إلا بالله" 

:D

ولما رجعنا، إحتفلنا مع جدو بزيارتك لبني سويف، عشان جدو كان جايب لحمه كتير على شرف زياره حضرتك :) ، 

وتالت يوم كان تكمله الإحتفال، عمتو بطه كانت بايته معانا من  تاني يوم هي وبلال وعبدالله، وعمو أحمد وطنط هند ونصر وحمزه جم على بعصر كده،، وعمتو عملت فته ولحمه كتييير :) وأكلنا يوميها وامبسطنا وعمو مهدي جه باليل وشافك هو و طنط فايزه مراته وإبنهم نصر :)

كل الناس روحت باليل بقى وتاني يوم الصبح فطرنا مع جدو طعميه فطار متأخر ونزلنا بعد الضهر ووصلنا القاهره الساعه خمسه كده وإنتي منتي نايمه في الكرسي ومش دريانه بأي حااااجه :)

عمتو وجدو كانو زعلانين إنك ماشيه وكانوا بيقولوا يعني إنتوا خليتونا نشوف العسل ده وبعدين عاوزين تاخدوه وتروحوا :)))

بس يا ستي :) دي مانت أول زياره ليكي لبني سويف :) 

اول سنه .. قصدي.. اول ناب! :)

النهارده يا ساره ٢٥ مارس ٢٠١٤ ، من ٤ ايام كده كنتي زعلانه ومقريفه .. انتي المفروض فاضلك ٦ ايام وتتمي الشهر الخامس وتدخلي في السادس :) .. كنا عند جدو لما اكتشفنا انك بتطلعي سنه ظغنونه حلوه زيك كده.. بس الحقيقه هيه مطلعتش سنه، طلعت ناب!! :))

وامبارح انا وبابا حبيبي اكتشفنا ان الناب اللي فوق كمان بيطلع.. وبابا كان فرحان اوي مع اني كنت قلقانه شويه عشان كان طالع من الجمب كده :))

وانتي كنتي زعلانه و متاثره اوي.. وكنتي لما بتعيطي عنيكي تتملي دموع في لحظه كانك بتعيطي من ٧ ساعات.. وحواجبك ومناخيرك يحمرو كده :) 

اكيد الكام يوم اللي جايين ان شاء الله هتكوني مزاجك مش قد كده.. ربنا يكون في عونك ويهون عليكي يا حبيبه ماما وبابا وان شاء الله سنانك تطلع بسهوله وتبقى احلى سنان ان شاء الله :)

لما كنتي زعلانه ومش راضيه تضحكي، انا وبابا طلبنا الصيدليه وجبنالك اول عضاضه  :)) عشان تهديكي شويه، بس انتي ماكنتيش عارفه تحطيها في بقك قوي لسه، عشان كده بابا فضل ماسكهالك عشان تعضعضي فيها :))

انا بكتبلك الكلام ده وانتي نايمه جوه في الليفينج مريحه شويه بعد الاكل :)

بحبك 

سها