كلام :)

يا ساره.. إزيك 😊

حبيت اقولك حاجه جت على بالي بسرعه :) .. بصي يا ستي، انا ميهمنيش أي حد بيقوللي الأطفال بيعملوا كذا وكذا.. وفي المرحله دي هيعملوا كذا وكذا.. وهيتصرفوا كذا وكذا :) .. مش بيهمني اي حد بيقولي اي حاجه هو شايفك بتعمليها.. عارفه ليه.. عشان انتي في عيوني انا وباباكي مختلفه :) .. أيوه :) .. إنتي مختلفه :) متسمحيش لحد يقولك إنك شبه حد، أو بتتصرفي شبه حد.. عشان كل واحد مختلف عن التاني.. وكل واحد جميل لوحده.. وروحه جميله لوحدها.. مش محتاج يكون شبه حد عشان يبقى أحلى في شكله أو في شخصيته :) .. فاهماني :) 

قالولي هتبقي تخينه بعد الولاده ومحصلش.. قالولنا انا وبابا انك مش هتعرفي تنامي بالليل وهتفضلي تعيطي طول الليل ومش هتنيمينا بالشهور وده محصلش.. قالولنا مش هتفهموا هي عاوزه ايه وهي نونو وبرضه محصلش.. قالولنا حاجات كتير عننا وعنك.. كإنهم عارفين المستقبل وفاكرين إن كل الناس زي بعض :) 

بس انا عاوزاكي تعرفي.. إن انتي جميله من بره ومن جوه،، عشان انتي انتي.. مش عشان شبه حد أو عشان بتتصرفي زي حد :)

وأنا عاوزاكي دايما تفكري كده :) عشان دي الحقيقه :) .. حبي كل الناس، بس إفضلي على حقيقتك.. إفضلي ساره ومتبقيش حد تاني :) 

كنت دايما لما حد بيقولك يا كتكوته أو يا قضطه تقوليله أنا مش كتكوته انا مش قطه، أنا ساره :)

ولسه لحد دلوقتي بتعملي كده :) خليكي كده.. خليكي ساره.. خليكي حقيقيه :) 

خليكي مع روحك "بس" :)

باقي ٢٠١٦ :)

سلام عليكم يا حلوه يا حبيبتي 😊

انا قلت اكمل السنه في بوست تاني عشان كده الكلام كتر قوي :)

كنا بنتكلم عن الروتين اليومي بعد مادخلتي الحضانه.. في يوم فهمتك وقلتلك بصي يا سوسي يا جميله..لو صحيتي من النوم ولقيتي لسه الشمس ماطلعتش يبقى كملي نوم ومتناديش على ماما ولا بابا ولو صحيتي ولقيتي الشمس موجوده انزلي وتعالي.. وافقتي وعملتي كده اسبوع فعلا وكنا بنشوفك الصبح بس.. بس رجعتي تعملي كده تاني مع الاسف :) وعرفت بعد ما سألت انك لسه صغيره انك تفهمي وتعملي الكلام الي اتفقنا عليه انا وانتي..

بس فس حاجه عاوزه اقولك عليها.. انا وبابا ساعات من كتر مانتي ماشاء الله عليكي بتتكلمي وبتتفاهي وزكيه كنا ساعات بنفتكر انك هتفهمي كل كلامنا :) معلش سامحينا على كده :-*

المهم كنا بنصحى وندخل الحمام ونغسل وشنا وسنانا وبعدين الايام القليله الي روحتي فطرتي في الحضانه فيها كانوا يتعدوا على الاصابع.. باقي الايام كنتي بتفطري في اللبيت وبعدين ننزل :)  .. بعد ما فات شهر تقريبا اتفقت مع الحضانه ان انا اشتري لعبه حلوه هتحبيها واديها للحضانه على اساس هم يقدموها منهم عشان تحبي المكان اكتر.. وفعلا اشتريت كتاب جميل هبقى احطلك صورته عشان تفتكريه.. وقالولك ان مس فاتن الي هي مسؤله عنك هي الي جابتهولك.. وكنتي سعيده قوي بيه وقولتلها شكرا ويبستيها.. ولحد دلوقتي انتي فاكره ان هي الي جابتهولك 😄 

وبعد ماكنتي بترجعي من الحضانه كنا بناكل او بنستنا بابا وبعدين ناكل ونلعب شويه وبعدين تنامي على الساعه ١١ كده.. وساعات كنتي بتنامي على الساعه عشره ونص كده.. 

بتحبي المكرونه زيي :) بتحبي الجبنه الشيدر.. وبتحبي السوبيا.. مشروبك المقدس كان "اللبن سوبيا" من قبل مانروح دبي.. بتحبي الباشاميل والفراخ والملوخيه وشوربة اللسان عصفور.. والبسله بالجزر.. والخضار السوتيه والمشروم جدااا.. 

وكنت انا وبابا لنا بنشرب حاجه بعد الاكل بتحبي تشربي معانا.. وتقولي "بابا لو سمحت ممكن انا كمان اشرب مشروب"

حاجات حلوه كتير يا سوسي لسه فاكراها هكتبهالك واحكيهالك.. بس كفايه عليا كده النهارده عشان ورايا حاجات :) 

وعشان منساش.. عاوزه احكيلك على العابك وعلى الشخصيات الي بتحبيها واهمهم "humpty dumpty" 😄

تلات سنين وشهرين 😊

يا ساره يا حبيبتي يا جميله إزيك.. انا متأسفه مكتبتش بقالي فتره طويله جدا،، سنه تقريبا 😊

هحكيلك كل حاجه وهقولك ملخص عن الحاجات الي حصلت السنه الي فاتت ان شاء الله

إحنا خلصنا رحلة دبي الطويله الي كنا فيها مع بابا هناك عشان شغله.. ونزلنا مصر في شهر مارس.. وكان عندك سنتين وخمس شهور تقريبا.. 

انت كنت ومازلت شاطره وجميله ومؤدبه.. بنتخانق طبعا وبتعيطي ساعات كتير وبنزعل كتير..بس من غير مجامله انتي شاطره ومؤدبه  😊.. طبعا كان وقت دخولك الحضانه جه بقى.. والحمدلله عرفنا حضانه كويسه إسمها "stars" كان سلوى وعلي ولاد طنط مريم وأنكل احمد كانوا فيها.. الحضانه حلوه ونضيفه وانتي حبتيها الحمدلله.. بس فضلتي تقريبا بتاع تلات شهور مش بتكوني عاوزه تنزلي وتقوليلي "يا ماما انا مش عاوزه اروح ستارز،، انا عاوزه اقعد معاكي وتعيطي وانا فضلت والله ايام واسابيع وشهور اقولك الصبح حاجات حلوه على المكان لحد ماتتشجعي وتبطلي عياط وتلبسي وتنزلي معايا 😊.. مكنتش زعلانه عشانك، كنتي بتصعبي عليا بس انا بكون عارفه انك مبسوطه هناك عشان كده مكنتش بكون قلقانه الحمدلله ووكمان عارفه انك بنت وعيك عالي وشجاعه 

ولطيفه 

ممم.. ايه كمان. يا ستي :) .. انتي بقيتي تحفه اصلا..وكلامك كله جميل وكل يوم بعدي كلامك بيكون احسن واحلى.. وانتي بتكبري وبتبقي احلى من بره ومن جوه :) 

بتحبي الناس كلها وكنتي طبعا اول السنه لسه شويه مش متعوده على انك تلغبي مع اطفال كتير.. وتشاركي معاهم في اللعب..بس بعد كده كل ماتكبري كل ماتكوني مبسوطه اكتر لو في اطفال بيلعبوا معاكي :) .. بتحبي هنا وعاليا قوي بنات عمو محمد.. في يوم كانوا  مسافرين لباباهم السعوديه وجم هنا قعدوا معانا عشان كانت طيارتهم متاخر.. ولما عرفتي انهم جايين كنتي فرحاااانه قوي وكلامك كله عليهم :) واتبسطي قوي لما جم وفضلتوا تلعبوا لحد مانزلوا الساعه ٢ بالليل ونمتي زي البطيخه اول مانزلوا 😊

بتحبي كل الاكل الحمدلله وبتحبي تجربي اكلات جديده لما انا وبابا نشجعك.. شاطره مش بتاكلي حلويات كتير ولا سكر كتير.. بتحبي الفواكه والخضار زي بابا ابوبكر الحمدلله.. وبتحبي بابا حب كبير :) في لعبه افتكرتها دلوقتي اسمها "انتي كاسونه انتي ماصونه" 😄😄 .. دي بابا بيشيلك ويرميك في الهوا فووق ويقولك انتي كاسونه والمره الي بعدها يقولك انتي ماصونه .. وفي لعبه تانيه اسمها الفلفصه على السرير وبابا يحطك ساندويتش ما بين المخدتين ويجيبك يمين وشمال.. وواحده تانيه اسمها جمبازيتوا.. بيقعد كده وضهره للكنبه وانتي تقفي وراه على الكنبه وتتقلبي فوقيه هب شقلباز وتنزلي على الارض.. 😄😄😄 

هقولك روتينك اليومي بعد الحضانه عامل ازاي.. كنا في الاول بنصحى بالعافيه طبعا وعياط وهيصه.. بس بعد مالدنيا ظبطت معاكي  وكنتي بتنامي في سريرك الحمدلله بس كنتي بتنادي الاول علينا وتقعدي في السرير وتقوليلي يا ماما تعالي انا عاوزاكي وانا اجي واشيلك تنامي معانا لحد الصبح.. وفي يوم من الايام بعد ما فات ايام كتير.. نديتي علينا واحنا ردينا بس ماقومناش.. وسكتي شويه كده وبعدين لقيناكي جايه على رجليكي 😄😄😄.. اتخضينا طبعا وعرفنا ساعتها ان رجليكي طولت وكبرتي حبه اكتر 💗 

سنتين يا ساره يا جميله :)

أول كتابه ٢٨ أكتوبر ٢٠١٥

يا ساره إزيك.. عامله إيه.. فتحت البلوج لقيتني بقالي كتير قووووي مكتبتش اي حاجه.. من شهر يونيه ! بس كان لازم أكتب النهارده ضروري عشان كمان تلات أيام ساره حبيبة ماما وبابا الجميله هتتم سنتين :) .. ربنا يبارك فيكي ويخلينا لبعض :) 

مش قادره أقولك كبرتي قد إيه ماشاء الله في التلات شهور اللي فاتوا يا سوسي.. ما شاء الله عليكي.. بصي يا ستي.. 

أولا انتي كنتي بتتكلمي من فتره زي مانا قلتلك قبل كده.. بس مكنتيش بتقولي جمل على بعض.. لحد أول جمله قولتيها "قولي إيه مااما" يعني بتقولي ايه يا ماما.. وبعدين توالت الجمل.. مش عارفه حكيتلك على القطه ولا لأ.. بس كان في يوم كده كنتي بتتفرجي على كارتون وبالصدفه جت اغنية فيها قطه كارتون كان عندها واوا في اديها وفي بنوته شافتها وراحت عالجتها وحطت لها شاش على ايدها وخدت بالها منها لحد مالقطه بقت حلوه وبتضحك وبتجري.. يا سوسي الفيديو ده فضل مأثر فيكي، أو بمعنى أصح في مصر كلها لمدة خمس شهور تقريبا 😀😀 

الجمله الشهيره " قطه كويسه يا مااما.. مالها القطه يا مااما.. عندها وااوا.. وبعدين قطه ضحكت" .. انتي سألتي مصر كلها السؤال ده يا ساره!!! 😀😀 .. ولما رحنا دبي لبابا في شهر ٨ سألتي دبي كلها السؤال ده 😀😀ده زائد بقى انك مكنتيش 

بتسألي مره واحده.. لا ييجي ٧٠٠ في اليوم 😀😀😀

المهم يا ستي.. انتي ما شاء الله عليكي من فتره طويله كمان وطبعا بفضل ربنا أولا ومجهوداتي انا وبابا ثانيا انتي شاطره ومن الاطفال القليلين اللي حافظين (ABC لحد الآخر.. وأ ب ت لحد الآخر.. و ١٢٣ لحد عشرين.. و123 لحد 20 وكمان عارفه الألوان.. والأشكال بالعربي والإنجليزي) 😊😊 ممكن ابقى اسجللك صوتك وانتي بتقوليهم كلهمان شاء الله.. بعد ماجينا دبي في نص شهر ٨ لقيناكي انتلقطي في الكلام على الآخر ماشاء الله.. والغنى بقى.. وبقيتي رغايه تقريبا.. بتعملي حاجات جميله يا ساره..

وفي انجازين كباااار قوي بقى عملناهم لما جينا دبي.. أول مره جينا دبي بالظبط يوم ٢٩-٨-٢٠١٥ قررت أنا بكامل قواي العقليه اني أقطع التيتينه عشان حضرتك تبطلي تاخديها وانتي بتنامي.. كنت بتنامي بيها الضهر وبالليل بس :).. وفعلا حصل الحمدلله :) أول وتاني يوم كانت حاجه تقطع القلب.. شكلك كان غلبان قوي وانتي كل ماتحطيها في بقك تلاقيها متغيره من فوق.. تقوليلي فين التيتينه يا ماما مع انك مسكاها في ايدك.. وتعيطيييي جااامد وتقولي انتي فين يا تيتينااا.. كنتي صعبانه علينا قوي 😀😀 هي موجوده لحد دلوقتي.. إن شاء الله هبقى احطلك صوره ليها عشان تشوفيها.. 

الإنجاز التاني والأهم هو انك شهر اكتوبر اللي فات وقبل عيد ميلادك بالتحديد يوم ١٨ اكتوبر ٢٠١٥ يعني قبل عيد ميلادك ب ١٥ يوم... الانجاز هو انك خلاص مبقاش في بامبرز 😀 اصعب فتره كانت اول تلات ايام.. كنا في دبي وانا حطيت فوط على الارض في كل حته 😀😀 ومشمع وهيصه.. المهم بغض النظر عن التفاصيل اللي مش ريحتها حلوه قوي 😊 بس انتي كنتي شاطره قوووي وفهمتي بسرعه وتاني اسبوع كنت خلاص الدنيا تمام التمام ماشاء الله 👍🏻☺️

بتوحشيني :)

ساره حبيبتي يا جميله إنتي :) النهارده ٢٠ يونيو ٢٠١٥ .. من أربع أيام بالظبط كان يوم أربع :) قررتي إنك تبطلي تاكلي من ماما :)))) كبرتي يا حبيبتي :) جربت معاكي كتير تاكلي تاني.. بس إنتي بتحبي تعدي في حضني بس من غير ماتكلي :)) .. 

إنتي عندك دلوقتي سنه و سبع شهور و عشرين يوم :)) ربنا يباركلي فيكي :) 

أنا مش زعلانه خالص ومرتاحه الحمدلله إنك قررتي كده :) بس ساعات بتوحشيني وإنتي في حضني وبصالي وانتي بتاكلي كده :))

بحبك قوي :)) وبحب وشك وعنيكي اللي شبه بابا حبيبي وضحكتك :)) يا رب تفضلي تكبري قدامي كده جميله ومؤدبه :) 

سنه ونص و ١١ يوم :)

إزيك يا سوسي يا حبيبتي :) .. بقالي كتير مكتبتش حاجه :)

هقوللك في السريع كام حاجه مهمه كده :) .. بصي يا ستي :) إنتي كبرتي ماشاء الله وجميله :) ودمك خفيف وشقيه ساعات :)

وعندك سنتين فوق وسنتين تحت، وضرس على الشمال تحت، لوحده كده كإنك واكله لبانه :)).. ومن إسبوعين، بدأ يطلع ضرس تاني فوقيه، وكمان سنتين فوق :)) 

بقيتي تطلعي على الكنبه خلاص ومتمكنه :) .. وتفضلي واقفه أو تجري فوق الكنبه لحد مانقوللك قعدي يا سوسي ٥٠٠ مره ونزعق، ساعتها تزحلقي رجلك كده وتعدي :)) :-*

وبترقصي!! هههه بطريقه زي العسل وبتضحك :)) على أي موسيقى أو أغنيه :) والكلمات اللي بقيتي تقوليها "ماما وبابا طبعا، ولاكه يعني لأه، وسيبي، A, B, ب، ت، سبع، سوسي، تيته وتيتو، وصوت القطه والبقره والبطه والكلب.. 

وبقيتي شاطره  بتساعديني في لم الغسيل ونشره :)) وتجبيلي الإسدال لما آجي أصلي، وكمان بتجبيلي الجزمه لو كنا خارجين :))

 

بابا سافر زيمبابوي مع الشغل شهر ٣ اللي فات :( وقعد ٣ أسابيع، وكنتي لما بتشوفيه على السكايب بتعيطي أول أسبوع وكام يوم كده، وكنتي بتصعبي علينا قوي :( .. وتفضلي تقولي "آي آي" :)) ده كان دلع بابا عندك :) ويوم مارجع، كنتي نايمه :) ولما صحيتي الصبح، راح هو عشان يجيبك من الأوضه، فرحتي قوي قوي، وبعدين قفشتي عليه لمدة يوم ونص تقريبا 😀 كإنك بتعاتبيه إزاي تمشي وتسيبني كل ده 😀.. وكل مايكون شايلك، تبصيله كده، وتعملي وش حزين :))) .. ولما تشوفي أي صوره أو ڤيديو ليه، تعيطي عشان فاكراه مشي تاني ودخل في السكايب، حتى لو كان هو اللي شايلك!! 😀😀

الشهر اللي فات سافرنا الجونه إحنا التلاته :) وكانت إجازه لطيفه الحمدلله، وانتي عمتي في البحر لعبتي في الرمله، وكنتي شاطره بس تعبتي بابا قوي :)) .. والناموس أكلك تقريبا 😀😀 كان عندك أكتر من ٢٣ قرصه منهم ١٥ في وشك بس.. هههه

بابا دلوقتي مسافر دبي بقاله إسبوعين :) ولما بقولك يلا نكلم بابا وأجيب الآي باد، تفرحي قوي، وتقعدي تقولي "بابا.. بابا" :)

ولما يظهر في الشاشه، مابقتيش بتعيطي، بتفرحي، وساعات بتكشري بس ترجعي تاني تندهي عليه، وتوريله اللعب وتنطي، وترفعي إيدك فوق كده زي مابتلعبي معاه.. وتلخبطي اللعب، عشان تلعبوا لعبة "كله في المصنع" 😀😀 لعبتكو المشهوره 

الإسبوع اللي فات، إتطعمتي تطعيم السنه ونص، كانت آول مره يا حبيبتي تتعبي كده :) رجلك كانت وجعاكي جدا، وسخنتي، وبطلتي تمشي على رجلك يوم ونص كاملين :) ،، أنا وبابا إتفقنا نطلعلك جواز سفر عشان لو قررنا نروح لبابا دبي :) واتصورتي صوره حلوه :))

آه صحيح، بتحبي البيض المسلوق جدااااا.. والسلطه :)) والميه بتاعة السلطه،، والكرونه باللحمه المفرومه :))

أول كلماتك يا سوسي يا جميله :))

البوست ده بقى هكتبلك فيه الكلمات اللي قولتيها لما بدأتي تعبري أو تكوني عاوزه تقوللي أي حاجه :))

على فكره إنتي أول كلام قولتيه خالص كان ،، مام مام مام ما،، و باب باب باب با.. :)

أول كلمه بعد كده كانت هندي ،،هههه،، أكانيه "akanee" ..كنتي طول الوقت بتقولي الكلمه دي.. وكمان "جاييياه" "gayeeyah"،، وبابا وأنا كنا بنهزر وبنقول ،، جاييياه لوحدييياه :))

وبتقولي "تاتا" لما بتكوني عاوزه تمشي على الأرض.. وتاكن "tuken" أو "takin" أو "duken" محدش عارف،، هههه

من شهر ونص شهرين كده،، كنتي بتاخدي دش، وأنا بلفك بالفوطه وبقوللك يللا يللا خبي رجليكي عشان الدنيا ساقعه، فوجئت إنك قولتيلي " شااائعه" ههههه كنتي عسللل قوي وانتي بتقولي كده، ومن يوميها وانتي هاريانا شااائعه.. وساعات تقوليها بال س نص نص كده على قد ماتقدري يعني،، وفوجئت برضه لقيتك بتقولي كده وانا بعد معالق السيريلاك وإنا بعملهولك، بقول واحد، اتنين .. لقيتك بتقولي شائعه،، قصدك سبعه يعني :))

وكان مره في كارتون، واحد فيه بيقول "ساعةٌ واحده".. لقيتك بتبصيلي وبتقولي شااائعه :)))))

ومن كام إسبوع كده، بتقولي "ليجو ليجو ليجو" ههههه .. و كمان " بونجا" 

آه وكمان " تينجا تينجا تينجااا" .. وصادفت إن كان في كارتون إسمه كده على فكره :))) لو قلتي حاجات جديده أو بابا إفتكر حاجه هبقى أكتبها بقى تاني إن شاء الله :))